Öll höfum við lent í því að vakna upp um miðja nótt og ná ekki að sofna aftur. Sumir lenda í þessu oftar en aðrir, en þetta getur orsakast af ýmsum ástæðum. Truflun á svefni getur þýtt að líkaminn sé að láta vita að eitthvað sé ekki í lagi, en oft er viðkomandi að upplifa kvíða, stress, áreiti eða jafnvel innbyrgt koffín í óhófi yfir daginn. Þegar við sofum gerir líkaminn við það sem þarf, bólgur minnka, frumur endurnýjast og því eykur svefnleysi líkur á að við þróum með okkur kvilla.

Nokkur ráð til að bæta þinn svefn

• Rútína á svefni
  Gott er að venja sig á að fara að sofa á svipuðum tíma og vakna á svipuðum tíma til að líkamsklukkan verði meðvituð um hvenær líkaminn á að undirbúa svefn. Fullorðinn einstaklingur ætti að sofa í 7-9 tíma á hverri nóttu.

• Hafðu herbergið dimmt og smá kalt
  Með því að vera í dimmu herbergi aukum við framleiðslu melatóníns og auðveldar það okkur að sofna.

• Ekki fara í símann, spjald tölvu eða aðra tölvu rétt fyrir svefn.
  Birta frá snjalltækjum sendir röng skilaboð til heilans og hamlar þar með framleiðslu melatóníns.
• Ekki drekka koffín seint á daginn
  Gott að er halda koffín neyslu fyrr á daginn, en koffín getur haldið vöku fyrir okkur og þannig haft mikil áhrif á svefninn okkar.
• Reyndu að fara uppí rúm og vera búin/n að öllu
  Gott skipulag getur verið róandi fyrir hugann áður en maður sofnar.

Alexandra Ósk Ólafsdóttir
Kírópraktor á kandídatsári